اولى تدوينات بهلوله بعد رحيلها

الاخوه المدونين
الاخوات المدونات
السلام عليكم ورحمه الله وبركاته
يتسأل البعض
هل عاد بهلول للتدوين بعد رحيل زوجته بايام ؟
عدت
نعم عدت لاحيى ذكرى بهلوله
فبعد ان اخذت رأى الاستاذ عصفور المدينه بارك الله فيه
نصحنى ان اقوم بنشر يومياتها
وهى عباره عن اكثر من 12 تدوينه كتبتها خلال السفر الى البلد
والكثير من التدوينات التى كانت تكتبها ولا تنشرها لمرضها او لنسيانها
وقد اتفق معه فى الرأى بعض المدونين
لذلك سوف اقوم بكتابه اولى تدويناتها

وعذرا انى لن ارد على تعليقاتكم

لان من كان لها الحق ان ترد رحلت

وانا ارد عليكم مسبقا

شكرا لكل من يدخل مدونه بهلول لقراءه تدوينات بهلوله

والتعليق عليها

وسوف انشر تدوينه جديده كل خميس

ارجوا التعليق كأن بهلوله موجوده

=====================================

حمرا يا قوطه

سعيده يا احلى بشر

عمنا سعد باشا الصغير قاعد ينادى فى الفضائيات وفى الكاسيت وحتى السى دى
وعماله يقول حمرا ياقوطه
حمرا يا قوطه
افتكرته وانا هنا فى نجع حمادى وانا ماسكه واحده قوطه طازه
تصدقوا طعمها فلا لى خالص فلالى من الفل
الزرع هنا طازه ياباشا وطعمه زى القشطه
افتكرت عندنا السوق وما ادراك ما السوق
الحاجه ولعت
كل حاجه زادت الطاق طاقين كوسه قوطه بطاطس بتنجان بلى وده اللى مزعل بهلول البلى غلى
رحت قعدت مع عم حسن عم بهلول
وسألته
كل الاراضى دى والزرع ده يا عم حسن والحاجه بتغلا
قالى
بعد ما انجعص
وسوى هدومه
فاكرنى مذيعه تليفزيون وفاكر نفسه عمنا البرادعى بتاع الطاقه الذريه
شوفى يا بنتى
التصدير هو اللى خلى الزرع يغلاء بياخدوا احسن فاكهه واحسن بصل واحسن بطاطس واحسن خضار ويصدروهم للخارج
واللى يفضل لينا احنا
قلت له لازم يسدوا احتياجاتنا احنا الاول وبعدين يصدروا
بص لى جامد قوى ووقف على حيله
وكنت فاكراه هيقول الى اللقاء فى حلقه قادمه
وقالى ربنا يسترها
ومشى
قعدت افكر وافكر طيب ليه يصدروا احسن واجود انواع الفواكه والخضار ويستوردوا بدالهم البمب والصواريخ اللى ملت الشوارع حتى الباشا الكبير بهلول جاب معاه صواريخ واحنا جايين نزور امه
جاب صواريخ من اللى بتنور احمر وتفرش فى السماء
وولع واحد باليل وهبا
ناس كتير جم يجروا
قالوا لهم ده بهلول مولع صاروخ
خدوا راجل كبير فى السن
وقال له تعالى يا بهلول
وانا قلت هيبون بهلول بكام بونيه وقفت من بعيد اتفرج وانا مستنيه
الراجل خد بهلول بعيد وقعد يكلمه
وبهلول وشه فى الارض
وبعدين لقيتهم عمالين يضحكوا مع بعض ويسلموا على بعض
بعد الراجل ما مشى سألته
فى ايه ؟؟؟؟؟
قالى ده جارنا عايز اجيب له كام صاروخ علشان فرح ابنه
وقال ايه
جبتك يا عبد المعين تعينى
لقيتك يا عبد المعين تتعان

البقاء لله

تحديث
عظم الله اجركم جميعا
اود ان اشكركم جميعا على شعوركم تجاه المرحومه هدى
ودعاءكم لها
وان كنت قد قصرت فى الرد عليكم
فعذرا

فلتبقى بهلوله بيننا
فهى احبت التدوين
ولن اغلق مدونتها
فلتبقى بهلوله بيننا

بهلوله فى سطور
الاسم : هدى عبد المنعم
مواليد : القاهره
عام 1973
وكانت تعتز انها من مواليد عام الانتصار
المؤهل : ليسانس اداب
كانت تتقن الفرنسيه والانجليزيه

لماذا كنا ندون ؟؟؟؟؟؟؟؟

كانت فكره بهلوله
وكانت تريد ان ننشر مشاكلنا وخلافاتنا على الملاء حتى يتعظ منها كل شاب وفتاه وكنت تقول دائما المثل الشعبى يا بخت من بكانى وبكا على ومضحكنيش وضحك الناس على
فكانت رحمها الله تريد لكل شاب وفتاه ان يرى الخطاء الذى يمكن ان يقع فيه الكثيرون حتى يتجنبه

وذات يوما كنا فى خلافات حاده بسبب التدوين وبسبب وصفى باوصاف طفوليه
واصدقكم القول ان كل ما كتبته بهلوله عنى صحيح مائه فى المائه
فقد كانت لى ام واخت وزوجه تنفطر عينى دمعا عليها
ساكمل كلامى
كنا ذات يوما نتناقش وقد علا صوتنا كثيرا وغضبنا من بعضنا البعض ولكنها اجلستنى كما كتبت على المائده المستديره كما اسمتها هى بنفسها
وقالت لى
انا احبك كما انت
ولتفعل ما تشاء
ولكن لنترك غيرنا يتعلم من اخطاءنا
فان اخطئنا نحن والخطاء لم يراه غيرنا فلربما يقع فيه
وان رأه غيرنا فانه يتعظ منه وينير له طريقه
فسألتها بكل بلاهه
ولكن لماذا نخرج اسرار بيوتنا لغيرنا ؟
فاجابتنى بكل ثقه
اننا ننشر ما قد ينفع الناس وان كان ذلك سرا
فثق بى وتوكل على الله
اخوانى
لا اخفيكم سرا ان بهلوله بعد العوده من البلد وهى مريضه جدا
ولكنها كانت تتحامل على نفسها لتزور اصدقائها فى مدوناتهم
والمدون الوحيد الذى كنا نعرفه هو عازف الناى
كان ياتى الينا ونذهب اليه
ولكن بعد مرض بهلوله كان ياتى الينا يوميا
وذات يوم كانت بهلوله تداعب زوجته وقالت لها
ايه رايك تعملى مدونه زى جوزك
فضحكت السيده وقالت لها
مدونه بالطشه ولا بالتقليه ياهدى خلينا للمطبخ والاولاد
فاصرت بهلوله ان تقوم بعمل اميل لها
وفعلا
قامت بعمل اميل ومدونه
ولكنها لم تكتب فيها حرف واحدا لوفاه بهلوله
اخوانى
اخواتى
ان كتب الله لى ان استمر فى التدوين

ساقوم بنشر
يوميات بهلوله
وهى عباره عن تدوينات كانت هدى تكتبها عن حياتها وحياه من حولها
وعنى انا شخصيا
وحتى عن امها واخواتها وجيرانها
انها يوميات
لا اقول رائعه
ولكن
يمكنها ان تبقى بهلوله معنا اتمنى ان تشاركونى الراى

هل انشر تلك اليوميات
ام
لا
وشكرا

الاربعاء 7 -11 -2007 بهلول
انا لله وانا اليه راجعون

توفيت الى رحمه الله السيده هدى عبد الله

صاحبه مدونه بهلوله

اثر عوده المرض اليها مره اخرى

وقد اخبرتنى قبل ساعات من وفاتها ان اخبركم بذلك

وانقل سلامها الى كل من دخل مدونتها

بهلول

واود ان اشكر الاستاذ /سيد

صاحب مدونه عازف الناى

على وقوفه الدائم والمستمر معنا فى فتره المرض

وتركه لاعماله وانشغاله بالمرحومه هدى

وموافقته على عدم نشر الخبر الا بعد مرور ثلاثه ايام

بناء على طلب خاص بالمرحومه هدى

او بهلوله

ليتكى تعودين يا طفوله ...فاخبركى بأفعال بهلوله

السلام عليكم

كل عام واخوانى واخواتى وكل المسلمين بخير
وعيد سعيد

اخوانى نعم اتمنى ان تعود ايام طفولتى حتى اخبرها بما تمارسه معى بهلولتى

انها تحرص دائما وفى كل تدويناتها على اظهارى كطفل
او كرجل غير مسئول عن تصرفاته
المهم
لنترك بهلوله تفعل ما تشاء وتظن ما تظن
لربما اكتشف يوما اكتمال نمو مخها وعودته الى العمل بصوره طبيعيه
ذهبت يا ساده الى موطنى ومسقط رأسى
قريه صغيره من قرى مركز نجع حمادى محافظه قنا
واصدقكم القول اننى بمجرد دخولى القريه
اترك عباءه السن عند مدخلها
انسى كل شىء واتذكر طفولتى
من محاسن القرى انها لا تتغير مثل المدن بمعنى
ان المدينه التى اعيش بها حاليا تتغير دائما حتى اننى اشاهدها دائما مختلفه
وتذكر انك عند غيابك عن المدينه تعود لترى الجديد
اما القرى الصغيره
فلا
انها كما هى
فى هذا المكان كنت العب وانا فى الكتاب بضم الكاف
وهنا قد انجرحت فى راسى فى تانيه ابتدائى
وفى هذا الركن فقدت ثلاثه عشر قرشا كنت قد ادخرتهم من مصروفى
وهنا كان يجلس عم حسن
اه
كم اتذكرك يا عم حسن
عم حسن كان رجل كبير جدا فى السن
كنا نجلس حوله بالساعات
كان يعطينا الحلوى ويطعمنا من طعامه ويسقينا من شرابه
وكان يحكى لنا حكايات كثيره
فكان يحكى عن ابو زيد الهلالى والزناتى خليفه
وعن محمد على
ومصطفى كامل والنحاس باشا واحمد عرابى وسعد زغلول
والانجليز والفرنسيين
وعن الحرب العالميه وهتلر
وعن الخلفاء الراشدين
ودول الخلافه من فاطميه وامويه وعباسيه
وعن قصص الانبياء
وسيره سيدنا محمد صلى الله عليه وسلم
وعن الثوره
والملك فاروق وفؤاد
وعن موسولينى
وعنتره ابن شداد
والملائكه والشياطين
والفراعنه
وصلاح الدين الايوبى
وحتى عن العفاريت والجن
كان عم حسن موسوعه علميه لم نكن نعرف قدرة وقتها وانما عرفت قدره بعد ان كبرت ودرست وقرأت الكتب العلميه والتاريخيه
وعندما اقراء شىء رواه لنا عم حسن كنت اجد انه لا يختلف عما هو موجود فى الكتب
حتى اننى كنت استوعب من كلام عم حسن عن استيعابى من الكتب
هنا كانت طفولتى
هنا ذكرياتى
فمن حقى ان افعل ما يحلو لى وان اعود الى طفولتى ولو اسبوع كل خمس سنوات
الستم معى ؟؟؟؟؟؟؟؟؟؟؟

بهلوله وجنون التدوين

السلام عليكم

مع انى اعرف تماما ان التدوين ليس له اى اثر فعلى على العقل
الا اننى اعرف ايضا وبما لا يدع للشك مجال ان لكل قاعده شواذ
وهذا ببساطه شديده ما حدث لزوجتى العزيزه بهلوله
لقد اصيبت بجنون التدوين
او على الاقل
بهوس التدوين
اصبحت تدون عن لا شىء
وعن اى شىء
حتى نال منى هذا الهوس
وان كنت انا محط تدوينها الدائم
ولا اعلم سر الهجوم المستمر والمتلاحق على شخصى البسيط
او
لماذا تحاربنى بهلوله بهذا الشكل ..وبحرب شرسه لاتتورع ان تستخدم فيها اى سلاح محرم او غير محرم
اذا كان السبب هو التدوين لغرض التدوين
فلماذا اكون انا لوحه الهدف
او لماذا اكون انا علامه الاكس
x
كتبت تدوينه عن حالتى وقت الصيام
تركت الدنيا كلها وانشغلت بحالتى وقت الصيام
ياترى
هل انحلت جميع مشاكلها ولم يبقى لديها غير حالى وقت الصيام ؟
لا اعرف الاجابه

يا عينى على المشاعر

السلام عليكم ورحمه الله وبركاته



الساده والسيدات الكرام

عز الله قدركم

بهلوله

او

مرهفه الحس بهلوله

بتتكلم عن المشاعر والاحاسيس والغزل

وبما انها سيده متزوجه فمن حقها ان تتكلم عن المشاعر

وبما انها انسانه فمن حقها ان تتكلم عن المشاعر

لكن الشىء المهم

ان فاقد الشىء لا يعطيه

كيف نطالب الرجال بالحب والمشاعر وهم لا يجدونها

انها كما قالت مشكله عامه

وانا معها فى ذلك

انها مشكله الرجال ايضا

فالرجل يدخل البيت ويلقى السلام ويجد الست تتمتم بشفتيها لايعرف ماذا قالت

هل ردت السلام ام توعدته بمعركه قادمه او عددت صفاته القبيحه

وبعد ذلك يأحذ الرجل حمامه ويغير ملابسه ويجلس الى الطعام ..ومازالت سيادتها تكشر عن انيابها

يجلس الرجل ويقوم بتناول طعامه وهو يفكر ماذا حدث ؟

والرجل الذكى حسب التجربه البهلوليه لا يبدء بالسؤال عما حدث لانه سيجد وابل من الاشياء التى ليس لها قيمه

مثل

الجيران نشروا الغسيل على غسيلنا وهات يا كلام عن الجيران

او البواب طنشنى وراح جاب طلبات فلانه قبلى وياخذ البواب نصيبه من الكلام المعسول

او بتاع الانابيب باع لى الانبوبه بكذا وسعرها كذا ويقف بتاع الانابيب فى الصف ياخذ نصيبه

او الجو حر وكاتمه والشفاط فى المطبخ بايظ وده دورى انا فى الكلام المعسول

او بتوع المغسله منضفوش السجاد بضمير او او او او حاجات كتير

انا من واقع التجربه اسيبها وااكل وبعد كده ادخل اريح شويه

اقوم من النوم

بس يا واد

بس يا بت

جننتونى

وصراخ

وعويل

اقوم داخل تانى الاوده واطلع شويه اوراق وعامل نفسى بشتغل علشان محدش يدخل عندى

او

البس هدومى واهيم فى شوارع المحروسه

وبعد كده

تقولى مشاعر

وقال ايه

شويه نسوان شبه بعض واكيد كل تصرفاتهم زى بعض

وتقولى بيحكوا بحرقه

يمكن حرقه من الفلفل الحراق اللى عمالين ياكلوه

نصيحه

الى احمد ابراهيم القاطن بدير النحاس

قصدى

الى كل النساء

عاملوا الرجاله زى ما عايزين يعاملوكم وانشاء الله تلاقوا نتيجه

بهلوله فردايه من الشعب

عجيه قوى يا اخونا حكايه بهلوله فردايه من الشعب
انا مش عارف جابت فردايه دى منين ؟
على العموم
العجب مش فى الكلمه
العجب فى لعب التلات ورقات بتاع بهلوله
بهلوله مراتى وانا عارفها كويس قوى
عارفين هى كتبت البوست ده ليه ؟
علشان تزود المصروف فى رمضان
بهلوله يا ساده ويا سيدات مبدتفعش حاجه
انا اللى بدفع مصاريف المدارس ولوازمها كلها
ممكن واحد يقول لى بهلوله خايفه عليك
وعلى الحمل بتاع المصاريف
اقول
يا اخوانى
انا مش عايز اعمل معاها مشكله واحنا لسه متصالحين من كام يوم
لكن انا عارف هى عايزه ايه
للعلم
بهلوله بتزود المصاريف على العبد لله فى السنه خمس او ست مرات
كل ما تروح تشترى حاجه وتلاقيها غاليه
تقعد تلالى وتغنى على الفقير بهلول وتقول
الدنيا ولعت الحاجه غليت اجيب منين المصروف مش مكفى
وفى اخر البرنامج تزود المصروف بعد ما اقعد اهديها واقولها خلاص يا بهلوله هنعمل ايه حظنا كده
وللعلم
هى مزوده المصروف فى شهر 8 وعايزه تزوده فى رمضان
انصحوها يا اخوانى
وقولولها
رمضان شهر عباده
مش شهر اكل وشرب

العفو عند المقدره

الاخوه المدونين والمدونات


نزولا على راى حضاراتكم

وبدون اى ضغط

قررت عدم نشر باقى فضايح بهلوله فى موضوع الدجالين

جعلنا الله واياكم ممن يعفون عند المقدره

وليعلم الجميع
واقسم بالله

ان الموضوع كان فيه الكثير

باقى فضايح بهلوله

الاخوه المدونين

انشاء الله سوف اكمل لكم حكايه بهلوله مع الدجالين

انا يا اخوانى كنت تعبان جدا وعاوز انام ..اول ما بهلوله دخلت البلاكونه وقفلت عليها وانا مش عارف هى بتعمل ايه جوه نمت على كنبه الصالون ورحت فى النوم

وانا نايم حلمت ان فى ناس بتنجد لعروسه والمنجد عماله يضرب القطن ..واتاريه كان خبط بهلوله على الباب

المهم صحيت زى عادتى الساعه سابعه بالظبط

لقيت نفسى نايم قدام البلاكونه افتكرت بهلوله

قلت الدنيا اتهدت النهارده

بصيت عليها من شيش البلاكونه لقيتها قاعده فى الارض وعينيها بطق شرار وماسكه فى ايدها المشابك بتاعه الغسيل ومكسره منها كتير وعينيها زايغه يمين وشمال

قعدت على الكنبه

افتح

ولا لا

افتح

ولالا

المهم يا ساده قريت الفاتحه والمعوذتين وفتحت الباب

لقيت الضباب حل على البلاكونه من كل اتجاه

قامت بهلوله من على الارض زى ما يكون عصر الديناصورات رجع تانى

قامت ساكته ودخلت الصالون ومشيت فى اتجاه الباب

وفجاءه اتحولت ناحيتى وغرست ضوافيرها فى وشى وراسى وصدرى وهاتك يا عض

وانا كنت منتظر منها الخيانه دى عملت حسابى وكنت كاسر بصله وهى بتموت من ريحه البصل وقربتها من مناخيرها قامت جريه على الحمام ورجعت

نبذه صغيره عن بهلوله

صدقونى يا اخوانى

بهلوله قويه جدا تقارب قوتى

وجسمها بنيانه قوى جدا بدرجه تفوق قوه بنيانى او قوه بنيان اى رجل عادى القوه

واذا حدثت مشادات بيننا وكانت مشاده قويه غالبا ما تنتهى نهايه دمويه الا حد ما

طبعا كثيرون سيقولون فين الرجوله فين مش عارف ايه ؟؟؟؟

ارد عليهم واقولهم

ربنا يرزقكم بزوجه فى قوه بهلوله

وعلى فكره انا وبهلوله قرايب وابوها قبل وفاته وصانى عليها وكان قبل الزواج

بس مش عارف ليه ماوصهاش عليا ؟؟

المهم

بعد نهايه المعركه بتفوقى بفضل البصل جات بهلوله من الحمام وماسه بطنها من الالم

وقالت لى

اسمع يابهلول من بكره هتعمل اللى اقولك عليه انا دافعه فى الحاجات دى اكتر من 400 جنيه علشان خاطرى وخاطرك

قلت لها موافق بس بشرط تحكيلى على كل حاجه

قالت لى موافقه وحكت لى على الحكايه كلها

وعلشان التطويل سوف احكى لكم كل حاجه البوست القادم بأذن الله

بهلوله والدجل

بهلوله ياساده يا افاضل اعلنت على الحرب الشنعاء
ليه ؟؟
انا مش عارف وكذا مره احذرها بلاش يا بهلوله الجرس وحشه
تقولى يا بهلول هو حد عارف احنا مين
وماسكه فى لعب البلى ولعب الكوره وهات يا تدوين
ماشى انا معاكى هو حد عارفنا ..
علشان كده احكى براحتك وانا هاحكى براحتى
عارفين يا ساده الست بهلوله الناضجه المتعلمه بتمشى وراء كلام الناس بتوع السحر والدجل
من مده كنت انا وبهلوله كالعاده فى نكد وخناق لحد ما توصل احيانا للعض والخربشه
قامت بهلوله سمعت كلام واحده صاحبتها وراحت لدجال علشان يصلح قرينها مع قرينتى علشان يبطلوا خناق نقوم احنا نبطل خناق ..كل ده وانا معرفش حاجه
الا مره لقيتها بتصحينى مع اذان الفجر وجرتنى من ايدى زى الدبيحه اللى رايحه السلخانه ..انا افتكر انها مصحيانى علشان نصلى الفجر مشيت معاها لقيتها وقفت قدام البلاكونه وقالت لى انا امسك ضلفه وانت تمسك ضلفه ونفتح الباب مره واحده ..قلت لها فى ايه يا بهلوله حطت صابعها على بقها وقالت هسسس ..زعقت فيها وقلت لها ايه هسسس هو انا فرخه فى ايه يا بهلوله
طنشت كلامى وقعدت تعد 1_2_3 وفتحت الباب وانا معاها مره واحده وقالت لى شم بسرعه يا بهلول الهوا بتاع الفجريه
قعدت اشم واشم وهى تشم لغايه لما خلصنا على الهوا بتاع الحى كله وبعدين مدت ايدها على رف فى البلاكونه وجابت كوبايتين كبار..شوب..مليانين ميه وكل كوبايه فيها ورقه وقالت لى اشرب نص الكوبايه دى وهات نصها ..قلت لها انا مش عطشان قالت لى بهلول اشرب علشان خاطرى
اشرب ايه يا ملحوسه فى عقلك كوبايه وسخه فيها ورق انت عقلك فوت والموتور بتاع نافوخك ضرب ...قامت ماسكه الكوبايه وشربت نصها واديتنى الباقى علشان اشربه
بصراحه انا عارف مخها وعارف انها مش هاتسكت رحت شارب النص التانى وانا قرفان
طلبت منى اشرب نص الكوبايه التانيه وفعلا شربت وخدت هى النص التانى وشربته
وبعد كده قالت لى الميه دى بركه من الشيخه محسن
قلت لها قصدك الشيخ محسن
قالت لا الشيخه محسن
قعدت افكر طول عمرى اعرف محسن مذكر ازاى بهلوله هتخليه مؤنث
قالت لى هى ست بس اللى عليها شيخ اسمه محسن
قعدت انصح فيها لغايه الساعه سبعه الصبح وهى ولا هى هنا
المهم يا ساده
المهم
تانى يوم قبل اذان الفجر صحيتنى تانى وانا كنت بصراحه خرمان نوم قلت اخدها على قد عقلها واشرب الميه من سكات وادخل انام
جريتنى برضه لغايه باب البلاكونه وقالت لى انا هدخل البلاكونه وبعد شويه هاخبط على الباب وانت تفتحلى
المهم دخلت البلاكونه وقالت لى اقفل الباب
قفلته
ونمت على كنبه الصالون ورحت فى النوم وسبت بهلوله فى البلاكونه
ساتوقف هنا ولنا بقيه ان شاء الله

اه من بهلوله

اه والف اه يا جدع..على بهلوله لما تخدع بهلول
وتوشوش عليه الودع ..وتفرش له الملايه بالطول
وتسوق عليه الدلع ..وتحشى له الحمام بالفول
وتطلع فيه البدع ..وتقول على المسالم غول
============
يا جماعه بهلوله خلتها خل
ومش خل طازه ..لا ده خل حمضان ..خلصنا موضوع الخروف وبعت العلف بالخساره ..لحد كده تمام ؟
ايه لزوم الفضايح اللى شغاله على ودنه دى ؟
كتبت بوست مائده مستديره فاكره نفسها كوندليزا رايس ..ولا مارجريت تاتشر ..او فاكره انها بتبحث موضوع حق االعوده ..ندعو الله ان يتم علينا حل هذه المشكله
قولوها حاجه يا جدعان دى حافيه اصلا
ههههههههههههههههههههه
مائده مستديره
ومفاوضات
طب اشترى لك مشط سرحى بيه شعرك الاول بدل موضه الكانييش اللى انقرضت من زمان
ولا اشتريلك ازازه برفان بدل من ريحه الثوم والبصل اللى على هدومك
مائده مستديره
سيبك من الهبل ده يا بهلوله هانم كعب الغزال
وسيبك من الفضايح
مانتى عارفه انا ممكن افضحك
ولا ايه
بقى انتى اشتريتى ب5 جنيه بلى وسبتينى اكسب بمزاجك
ده انا كده بقى عيل خالص
الناس تقول عليا ايه
طفل انابيب
يا بهلوله انتى شريره متوحشه ملتويه زى الحيه ذات الاجراس
يا بهلوله انا غلطان انى لعبت معاكى بلى
فعلا الست ست
ومش كل الستات زى بهلوله لا الستات الكويسين كتير
لكن نصيحه
سيب راس التعبان
ودق راس بهلوله

فضحتينى يا بهلوله

طيب يا بهلوله ماشى عجباكى الفضايح دى
من ساعه ما طلعتى من المستشفى وانتى شما نفسك عليا قوى ليه


عماله تلبخى شمال ويمين زى المسعوره كده ليه


مش عاجبك الورد اللى كنت باجيبه فى المستشفى ؟


هو انا كنت مشتريه من بتاع البرسيم ولا ايه ؟


وانا كنت باكل اكلك مش انا اللى مشتريه ومشترى بزياده علشان ناكل سوى


حرام عليكى انتى يا بهلوله


اما الخروف عملتى عليه هيصه وفرجتى علينا امه لا اله الا الله ليه كده ؟


الاوضه اللى على المنور فاضيه مفهاش حاجه


يا جماعه احنا عندنا اربع اوض واسعين جدا ومطبخ واسع وحمام واسع بتنام فيه بهلوله ساعات


فى اوضه من الاربعه مفهاش غيرنيش قديم


وانا حبيت ااكل لحمه بمعرفتى


انا باعرف اربى كويس


وبحافظ على النظافه كويس قوى


فيها ايه لما اربى الخروف واتابعه بالنظافه والاهتمام


الدنيا مش هتولع


وخليكوا شاهدين بهلوله بنت ام بهلوله


حفيده بهلوله الدر


بتهددنى بالاكياس البلاستيك

اعقلى يا بهلوله احسن لك

اعقلى يا بنت الناس بدال ما اولعها على دماغك

اعقلى ولمى الدور احسن

انا راجل البيت واى حاجه اقولها تتنفذ

انا غلطان

انا غلطان

عارفين ليه ؟

كنت دخلت انا عملت العمليه لبهلوله وخلصت منها

دى خنصره بمزاجى

السلام عليكم
قريت كلام بهلوله اللى كتباه انهارده
الوليه دى اكيد اتجننت انا بلعب بلى مع ولاد اختى ايوه يابهلوله حصل والله حصل وانتى مالك متغاظه ليه دول اطفال ولعبت معاهم ايه كفرت
بهلوله الزمى حدودك فى الكلام وانا لو مش حالف ان اى كلام تكتبيه ماليش دعوه بيه انا كنت طرباتها على دماغك
وبعدين انا لما اتخنقت معاهم على النيكل كنا بتهزر ياختى مالكيش دعوه
وتعالى هنا انتى فاكره نفسك اجاثا كريستى اصحى فوقى روحى خديلك دش علشان تفوقى انا عارف من بدرى انك بتخنصرى من ورايا ومطنش بمزاجى والله مطنش بمزاجى وعلشان تتاكدى روحى لصاحبتك ام شريف وخليها تسال جوزها انا حكيت معاه فى ايه وحلفيه على المصحف وهو هيقولك انى اتكلمت معاه وقلت له مراتى بتزوذ عليا فى الحاجات اللى بتشتريها قالى كبر دماغك وسيبها دى بتروح السوق تجيب حاجات ب30 جنيه بتسمسر 5 جنيه قصادهم يا سيدى لو انت رحت هتوجع دماغك وتناكف مع الناس بقد اللى هيه هتخده عشر مرات
ومن يومها وانا عارف ومطنش
اما حكايه البخل ده رايك وانتى حره فيه
بس فى حاجه انا مش فاهمها فى حكايه الصور هى ارخص من 30 جنيه بكتير ؟؟؟؟؟؟

نسوان فاضيه

حد يصدق اللى هى بتقوله ده انا برضه هاخد حله وامشى بيها فى الشارع صدقونى الست دى هى اللى لسعت مش انا
موضوع الحله ده كان السنه اللى فاتت بعد ماتش النهائى بتاع كاس افريقيا وانا كانت جانبى صنيه الشاى جريت على بره ونسيتها فى ايدى ولما نزلت من العماره كسلت اطلع تانى علشان اطلع الصنيه حططها جنب البواب الظاهر نسيها وضاعت بعد ماروحت وكانت هدومى سليمه وفردتين الجزمه موجودين قالتلى فين الحله قلتلها حله ايه نامى قامت نايمه على طول للصبح ومدتهاش ولا قرش صاغ من تمن الصنيه هى فاكره نفسها مين دحنا رجاله قوى
وامبارح انا فعلا خدت الستاره الحمراء وقعدت تتحايل عليا والنبى يا بهلول سيبها
بصتلها بصه واحده قامت قفله بقها على طول

انا بهلول

السلام عليكم
دى مش اول مره ادون فيها لا انا مدون قديم لكن مراتى بهلوله عايزه تعمل راسها براسى وعملالى فيها اجاثا كريستى وجات عليا وانا بدون باليل وصرحتنى ان عندها مدونه امت واخدها قلمين وقلت لها تدوين ايه يا روح امك انا بس فى البيت ده اللى من حقه يعمل اى حاجه
فالت انا اسفه حقك عليا دى غلطه وامسحها فيا والنبى يا بهلول علشان خاطرى يابهلول لغايه الفجر وهيا تعيط وتترجانى اسامحها .لغايه لما سامحتها غلبانه
بس اشترط عليها لو عايزه تدون يبقى تحت سمعى وبصرى نعمل مدونتان مع بعض
امت فرحت وقالتلى ربنا يخليك يا سبعى
رحت عامل مدونه وسميتها باسمها ومدونه باسمى علشان افرغ كل اللى جوايا منها