بهلوله والدجل

بهلوله ياساده يا افاضل اعلنت على الحرب الشنعاء
ليه ؟؟
انا مش عارف وكذا مره احذرها بلاش يا بهلوله الجرس وحشه
تقولى يا بهلول هو حد عارف احنا مين
وماسكه فى لعب البلى ولعب الكوره وهات يا تدوين
ماشى انا معاكى هو حد عارفنا ..
علشان كده احكى براحتك وانا هاحكى براحتى
عارفين يا ساده الست بهلوله الناضجه المتعلمه بتمشى وراء كلام الناس بتوع السحر والدجل
من مده كنت انا وبهلوله كالعاده فى نكد وخناق لحد ما توصل احيانا للعض والخربشه
قامت بهلوله سمعت كلام واحده صاحبتها وراحت لدجال علشان يصلح قرينها مع قرينتى علشان يبطلوا خناق نقوم احنا نبطل خناق ..كل ده وانا معرفش حاجه
الا مره لقيتها بتصحينى مع اذان الفجر وجرتنى من ايدى زى الدبيحه اللى رايحه السلخانه ..انا افتكر انها مصحيانى علشان نصلى الفجر مشيت معاها لقيتها وقفت قدام البلاكونه وقالت لى انا امسك ضلفه وانت تمسك ضلفه ونفتح الباب مره واحده ..قلت لها فى ايه يا بهلوله حطت صابعها على بقها وقالت هسسس ..زعقت فيها وقلت لها ايه هسسس هو انا فرخه فى ايه يا بهلوله
طنشت كلامى وقعدت تعد 1_2_3 وفتحت الباب وانا معاها مره واحده وقالت لى شم بسرعه يا بهلول الهوا بتاع الفجريه
قعدت اشم واشم وهى تشم لغايه لما خلصنا على الهوا بتاع الحى كله وبعدين مدت ايدها على رف فى البلاكونه وجابت كوبايتين كبار..شوب..مليانين ميه وكل كوبايه فيها ورقه وقالت لى اشرب نص الكوبايه دى وهات نصها ..قلت لها انا مش عطشان قالت لى بهلول اشرب علشان خاطرى
اشرب ايه يا ملحوسه فى عقلك كوبايه وسخه فيها ورق انت عقلك فوت والموتور بتاع نافوخك ضرب ...قامت ماسكه الكوبايه وشربت نصها واديتنى الباقى علشان اشربه
بصراحه انا عارف مخها وعارف انها مش هاتسكت رحت شارب النص التانى وانا قرفان
طلبت منى اشرب نص الكوبايه التانيه وفعلا شربت وخدت هى النص التانى وشربته
وبعد كده قالت لى الميه دى بركه من الشيخه محسن
قلت لها قصدك الشيخ محسن
قالت لا الشيخه محسن
قعدت افكر طول عمرى اعرف محسن مذكر ازاى بهلوله هتخليه مؤنث
قالت لى هى ست بس اللى عليها شيخ اسمه محسن
قعدت انصح فيها لغايه الساعه سبعه الصبح وهى ولا هى هنا
المهم يا ساده
المهم
تانى يوم قبل اذان الفجر صحيتنى تانى وانا كنت بصراحه خرمان نوم قلت اخدها على قد عقلها واشرب الميه من سكات وادخل انام
جريتنى برضه لغايه باب البلاكونه وقالت لى انا هدخل البلاكونه وبعد شويه هاخبط على الباب وانت تفتحلى
المهم دخلت البلاكونه وقالت لى اقفل الباب
قفلته
ونمت على كنبه الصالون ورحت فى النوم وسبت بهلوله فى البلاكونه
ساتوقف هنا ولنا بقيه ان شاء الله