الاخوه المدونين
الاخوات المدونات
السلام عليكم ورحمه الله وبركاته
يتسأل البعض
هل عاد بهلول للتدوين بعد رحيل زوجته بايام ؟
عدت
نعم عدت لاحيى ذكرى بهلوله
فبعد ان اخذت رأى الاستاذ عصفور المدينه بارك الله فيه
نصحنى ان اقوم بنشر يومياتها
وهى عباره عن اكثر من 12 تدوينه كتبتها خلال السفر الى البلد
والكثير من التدوينات التى كانت تكتبها ولا تنشرها لمرضها او لنسيانها
وقد اتفق معه فى الرأى بعض المدونين
لذلك سوف اقوم بكتابه اولى تدويناتها
وعذرا انى لن ارد على تعليقاتكم
لان من كان لها الحق ان ترد رحلت
وانا ارد عليكم مسبقا
شكرا لكل من يدخل مدونه بهلول لقراءه تدوينات بهلوله
والتعليق عليها
وسوف انشر تدوينه جديده كل خميس
ارجوا التعليق كأن بهلوله موجوده
=====================================
حمرا يا قوطه
سعيده يا احلى بشر
عمنا سعد باشا الصغير قاعد ينادى فى الفضائيات وفى الكاسيت وحتى السى دى
وعماله يقول حمرا ياقوطه
حمرا يا قوطه
افتكرته وانا هنا فى نجع حمادى وانا ماسكه واحده قوطه طازه
تصدقوا طعمها فلا لى خالص فلالى من الفل
الزرع هنا طازه ياباشا وطعمه زى القشطه
افتكرت عندنا السوق وما ادراك ما السوق
الحاجه ولعت
كل حاجه زادت الطاق طاقين كوسه قوطه بطاطس بتنجان بلى وده اللى مزعل بهلول البلى غلى
رحت قعدت مع عم حسن عم بهلول
وسألته
كل الاراضى دى والزرع ده يا عم حسن والحاجه بتغلا
قالى
بعد ما انجعص
وسوى هدومه
فاكرنى مذيعه تليفزيون وفاكر نفسه عمنا البرادعى بتاع الطاقه الذريه
شوفى يا بنتى
التصدير هو اللى خلى الزرع يغلاء بياخدوا احسن فاكهه واحسن بصل واحسن بطاطس واحسن خضار ويصدروهم للخارج
واللى يفضل لينا احنا
قلت له لازم يسدوا احتياجاتنا احنا الاول وبعدين يصدروا
بص لى جامد قوى ووقف على حيله
وكنت فاكراه هيقول الى اللقاء فى حلقه قادمه
وقالى ربنا يسترها
ومشى
قعدت افكر وافكر طيب ليه يصدروا احسن واجود انواع الفواكه والخضار ويستوردوا بدالهم البمب والصواريخ اللى ملت الشوارع حتى الباشا الكبير بهلول جاب معاه صواريخ واحنا جايين نزور امه
جاب صواريخ من اللى بتنور احمر وتفرش فى السماء
وولع واحد باليل وهبا
ناس كتير جم يجروا
قالوا لهم ده بهلول مولع صاروخ
خدوا راجل كبير فى السن
وقال له تعالى يا بهلول
وانا قلت هيبون بهلول بكام بونيه وقفت من بعيد اتفرج وانا مستنيه
الراجل خد بهلول بعيد وقعد يكلمه
وبهلول وشه فى الارض
وبعدين لقيتهم عمالين يضحكوا مع بعض ويسلموا على بعض
بعد الراجل ما مشى سألته
فى ايه ؟؟؟؟؟
قالى ده جارنا عايز اجيب له كام صاروخ علشان فرح ابنه
وقال ايه
جبتك يا عبد المعين تعينى
لقيتك يا عبد المعين تتعان
Subscribe to:
Post Comments (Atom)
41 comments:
السلام عليكم ورحمة الله وبركاته
أولا انا فرحان جدا بالفكرة ونشر يوميات بهلولة ربنا يرحمها وكان نفسي والله اطلب كده من حضرتك بس أحرجت بصراحة
بالنسبة بقى لحكاية التصدير والاستيراد فبالفعل مقاش النهاردة مصلحة المواطن هي المهمة لاء
بقت الفلوس هي اللي بقت تحرك معظم المؤسسات ورجال الأعمال دلوقت
واحنا بقى مش مهم نولع بجاز
ربنا يرحمنا
المهم حضرتك جبت صورايخ للراجل ولا طنشته؟
:)
فعلا حاجة تفرقع احنا بننتقد ووقت ما نتحط في الحدث نعمل زي اللي بننتقدهم
رحم الله بهلولة ونور قبرها
بهلولة حبيبة قلوبنا كلنا
ها أنا أضحك مثلما فعلت كل مرة وأنا أقرأ مدونتك ولكن غصب عني هذه المرة فالضحك سرعان ماتقهقر مني وغلبني الدمع ..............................................................ولم أستطع أن أرى مفاتيح الكيبورد ها أنا اعلق على موضوعك الساخر حمرا ياقوطة
ومجنونة يا قوطة
وكل حاجه في حياتنا بقت مجنونة يوم نلاقيها ويوم مانلقهاش يوم في العلالي ويوم في الواطي وما نلقهاش برضة وكان نفسي أكون معاكم في البلد وانتي بتعملي حديث مع الفلاح القروي البسيط زي حكاوي القهاوي ولابسه انتي كمان جلابية بلدي مطرزة وبتقولي ان كنت غاوي وان كنت ناوي
هات المفعوصة
حمرا ياقوطه
بهلولة بدعيلك من قلبي
يجعل قبرك روضة من رياض الجنة
يجعل قبرك كله نور في نور
يجعل أعمالك الصالحة عين لكي تشاهدي بيها مقعدك في الجنة...أمين .. امين
في رحاب الله يابهلولة
الاستاذ بهلول
لي عندك طلب وأرجو أن لا ترفضه
رغم عدم معرفتي بالأخت بهلولة عن قرب إلا أني كنتي واللهي أشعر أني أعرفها كل المعرفة وأنها كانت بمنزلة الأخت الحنونة التي كانت تزيح عنا الكثير من الهموم والكأبة بكتاباتها الجميلة الساخرة
فحينما صُعقت بالخبر حزنت كل الحزن وشعرت كأني كنت مسافر ولم اشاهدها قبل رحيلها عنا لذلك أتمنى منك أن تنشر لها صورة من صورها نراها ونشعر على الأقل أننا شاهدنا أخت عزيزة علينا وودعناها قبل رحيلها
اخوك حسن
مش قادرة اضحك على كلامك العفوي وخفة دمك وانتي بتتكلمي .. والله كأني اعرفك من زمان ...
رحمك الله رحمة واسعة اللهم آمين
اتيت اليكى يا بهلوله لكى اعلق كانكى ما تزالين هنا بيننا
وعلى فكره
الصواريخ دى انتى كنتى عارفه انى واخدها معايا لان ولاد اخويا طلبوها
وافتكرى ان انتى اللى حطاهم فى الشنطه بايدك
سلام يا اجمل من رأت عينى
اخى الكريم حسن ارابيسك انا مقدر شعورك واحساسك النبيل
ولكن المرحومه بهلوله
كانت حريصه على الا تفصح عن شخصيتها وهى على قيد الحياه
حتى معرفتنا الوحيده بعازف الناى كانت صدفه
فكيف افعل شىء بعد وفاتها لم تفعله هى فى حياتها ؟
ارجوا ان تقدر كلامى وموقفى
وارجوا الا يغضبك هذا الموقف
لانك واحدا ممن كانت تحترمهم بهلوله جدا
اخوانى المدونين الكرام
سامحونى ان لم ارد على تعلقاتكم
فانا زائر مثلكم
لتدوينات بهلوله
يا ستى بهلوله مانتى عارفه الاجانب ياخدوا خير بلادنا
واحنا على رايك
ناخد بمبه
بس مقولتيش بهلول عقد صفقه الصواريخ دى ولا لا
##############
شكرا بهلول
اعدت لنا البسمه
ارجوا ان تستمر
السلام عليكم
شكرا أستاذ بهلول على أحياء ذكرى بهلوله
ولتبقى بهلوله بيننا
وكالعاده أنتابنى بسمه رقيقه وبريئه مثل التى كانت تنتابنى كل مره أقرىء فيها بوست لبهلوله
وجميل أنها على طول شايفك طفل فى عنيها
ولكن بسمه تحمل بداخلها حزن بدون أرادتى
وربنا يرحمها ويرزقها الفردوس الأعلى ويجمع بينكم فى خير فى الجنه ان شاء الله
اخى الكريم
حاولت ان أجد وسيلة للاتصال بحضرتك لم أجد
اخى عذرا لم استطع ان اقرأ التدوينة او بالاحرى لم استطع التعليق عليها
فأنت كتبت مقدمة دامعة
اريد منك انت ان تكتب
ولا مانع من دمج كتاباتك مع كتباتها
لكن اخى انها اقدار الله
رحمها الله واسكنها جناته
السلام عليكم
اخى بهلول اتمنى تكون بخير
مش عارفه بس فعلا حسيت كانها لسه موجودة بجد سبحان الله وكلامها وروحها
جزاك الله خيرا وربنا يجعلك انت وهى من اهل الجنة يا رب اللهم امين
الاخ بهلول انا دخلت عند بهلولة كالعادة ورأيتك نشرت موضوع من موضوعاتها هى فكرة حلوة ولكن بصراحة مقدرتش اكمل قراءة مش متصورة انها مش هى اللى منزلاه وحاسة انى حقرأحاجة مش لها ولكن عندما تستقر الحالة النفسية واتقبل ده اكيد حدخل وأقرأ واعلق بس مرة تانية معلش اعذرنى .. تحياتى
عزيزى أدعو الله أن يصبرك
ويقويك على مصابك
فليرحمها الله
لم يسعدنى الحظ لأعرفها وأقرأ لها سابقا
ولكن قرأت ما خطت يداها
وأجد صعوبة فى التعليق
عفوا
فليرحم الله تلك الرائعة خفيفة الروح
كلماتها تنساب بخفة إلى القلب
رحم الله اختنا بهلوله
و جعل مثواها الجنة
ههههههههه
ما قولتلناش يا بهلول عملت الصفقة ولا لسة؟
الله يرحمك يا بهلولة
يااااااااااارب
إن كانت محسنه فزدها فى احسناها
وان كانت مسيئة فتجاوز عن سيئتها
اللهم امين
بهلول
أين المزيد من تدوينات بهلولة
ولكن لي اقتراح بما أنها تدويناتها
أرجو أن تنشر في مدونة بهلولة
لان كما قلت انت من قبل تظل مدونة بهلولة موجوده
وانت تبقى كما انت تكتب تدويناتك في مدونتك
هذا أفضل بكثير
على فكرة فؤجئت اليوم من قليل بوجوج مدونتين في مدونة واحده
طهقانه وطهقان
وهما نسخه من مدونتك أنت والراحلة بهلولة
ولن أخفي عليك سرا
أن هذا اثار في داخلي الريبة
فالمدونتان نسخه طبق الأصل من حيث الفكرة والأخطر من حيث الأسلوب
مش عارف حاسس بحاجه غريب والله أعلم
السلام عليكم
فكرة جيدة
رحمها الله رحمة واسعة فكلامها له تأثير
اللهم أغفر لها وتجاوز عن سيئاتها
ونسألك الله أن تكون ممن رضيت عنهم وان تكون في روضة من رياض الجنة الآن
آمين
كان نفسي اتعرف بيكم قبل اليوم لكن قدر الله وما شاء فعل
رنا يرحمها و يسكنها فسيح جناته
................
موضوعك جميل جدا يا بهلوله و باتمني ان تكون باقي موضوعاتك في مستوي افضل باستمرار
............
تحياتي لكي
استاذ بهلول
تحياتي لشخصك الكريم
اتمنى تكون بخير وعلى مايرام
رَحِمَ الله بهلولة كانت دايما بتلمنا حواليها رحمها الله مازلت اتذكرها واللهي ودائماً أقرألها الفاتحة وأنا مقصر في تواجدي هنا بسبب ماينتابني من ألم وحزن وتذكر بوستاتها الجميلة وتعليقاتها الفريدة
المهم اين بقية بوستاتها التي وعدتنا بها
نحن في الانتظار نحن في انتظار بوستاتك يابهلولة.. مش عارف انا كنت اقترحت عليك من قبل ان تنشر بوستاتها في مدونتها هي مش عارف جايز انت عملت بنصيحت هاروح دلوقتي واطل عليها يمكن الاقيك منزل حاجه ليها
تحياتي
والفاتحة على روح بهلوله مدونتنا الرائعة
السلام عليكم
يعتب دى اول مرة أدخل فيها المدونة
أولا البقاء لله وحده
ومفيش غير الدعاء قدامنا
بجد انا لما قريت معظم المدونة وأظن جزء كبير منها جيت عند بوست وبكيت
ربنا يصبرك يا استاذ بهلول
إنا لله وإنا إليه راجعون
ربنا يرحمها
ويصبرك
بس بجد فكرة جميلةأوى إنك تنشر اليوميات بتاعتها
أكيد هى كانت عايزة كده
وصدقنى أنا حاسس انها معانا هنا
مع انى معرفهاش بس إحساسي مش يخيب
ربنا يصبرك وجزاك الله كل خير
فيه اجه نسيت أقولهالك يا أستاذ بهلول
أفتكر قول الرسول ( صلى اللى عليه وسلم (
لله ما أخذ .. ولله ما أعطى
فاصبر واحتسب
ربنا يرحمها ويحسن إليها
ربنا يرحمك يا اخت هدى
اللهم اغفر لها وابلغها الجنه
اللهم نقها من الذنوب كما ينقى الثوب الابيض من الدنس
اللهم اجعل مثواها الجنه يا رب العالمين
رحم الله بهلوله
دي اول زيارة ليا للمدونتين
طب انت كدة بتكتب يوميات بهلوله امال فين يومياتك وياتري عامل ايه بعدها طمنا عليك وربنا يصبرك
الفراق صعب
اين انت يا اخي
استحلفك بالله ان تكتب ما تركته وبه عبرة او شيء طيب كانمت تحب ان يتعلمه غيرها فهي بمثابة صدقة جارية ونحسبها كذلك
اتمنى ان تكون بخير واولادك ان شاء الله
رزقكم الله الصبر
كيف حالك يا استاذنا
ياريت تطمنا عليك
السلام عيكم
استاذ بهلول
تحية احترام وتقدير
مدوناتكما غاية في الروعه والجمال
رحم الله زوجتك بهلوله
وعفا عنها
وغفر لها
امين يا رب
اري ان تنشر تدوينتها علي مدوناتها هي
وان تظل مدونتك كما هي
وان تحكي لنا في مدونتك عن المرحومه لتظل ذكراها دائمه ومسمره بيننا
وفقك الله وصبرك
الفكرة جميلة اوى...واكيد هي حاسة بيك ...
ربنا يرحمها وينور قبرها ويجعلة من رياض الجنة....
معلش انا اسفه
انا لسه مقرأتش اى حاجه فى اليوميات
بس ان شاء الله اقرأها
انا حبيت اقولك
ان لله وانا اليه راجعون
موت الاخرين دائما يوقفنا ويهزنا ويجعلنا نسأل انفسنا يجب ان نحاسب انفسنا قبل ان يأتى يوم الحساب
قل (اللهم اجرنى فى مصيبتى واخلفلى خيرا منها)
اسأل الله لك الصبر
استاذ بهلول
نتمني من الله ان تكون بخير
نريد ان نطمئن عليك
ليس اكثر ولا اقل
رحمها الله رحمه واسعه
البوست حلو اوى اوى ودمه خفيف
استاذ بهلول
كل عام وانت بخير بمناسبة شهر رمضان الكريم الذي ندعو فيه لبهلولة الأخت هدى عبدالمنعم بالرحمة والمغفرة وأن يجعل الله قبرها روضة من الجنة وفي البقيع دعائك لها دائما في كل صلاواتك ودعائك في هذا الشهر الكريم
أدعوي لكي يابهلولة ( الأخت هدى عبدالمنعم
في الأن وفي رمضان ان شاء الله بالرحمة والمغفرة
رحمكِ الله يابهلولة وأسكنكِ فسيح جناتك
كان نفسي تكوني معانا في الأيام المباركة دي بخفة دمك نقرأبوست لكِ من الليكنتي بيتخففي بيهم عننا وعنك
رحمكِ الله
حسن أرابيسك
الليلة ليلة 27 رمضان
أسأل الله العظيم رب العرش الكريم أن تكون من أهل الجنة
اللهم اغفر لها وارحمها ، واجعل مثواها الجنة ، يارب تكون الان في الجنة
يارب ارضيها وارض عنها آمين
------
معلش على تقصيري الفترة اللي فاتت ، لكن بدعي لاختي هدى كل ما افتح مدونتي والله
لعل المانع خير
لم تكمل ما بدأت
يا رب تكون بخير
ننتظرك
رغم انها ويارتى الأولى والأخيرة
إلا أننى أضع نفسى مكانها دائماً
فمن يا ترى سيزور مدونتى بعد مماتى
من سيتذكرنى؟
من سيدعو الله لى بالرحمة والمغفرة؟
اللهم شفع فيها كل هؤلاء الأحبة
وتقبل منهم خالص الدعاء
يا أكرم الأكرمين
اللهم استجب بحق اسمك العظيم الأعظم
السلام عليكم
كل سنة وانت بخير
وكل سنة وجميع أحبابك بخير وصحة وسعادة
وكل سنة وكل المسلمين علي شريعة الله وسنة الحبيب المصطفي رضي الله عنه وأرضاه
وان شاء الله نستفيد من رمضان بكل السبل
ونخرج منه أفضل مما ولجنا به
يا رب أعنا علي القيام والصيام والصلاة
ووفقنا لما فيه الخير للجميع يا رحيم يا كريم
وارزقنا العفاف والرضا - والمحبة واهدينا يا عظيم
وأعنا علي القيام والصيام والصلاة والارتقاءالي جنة الفردوس
واجعلها لنا ميراث خير وسعادة
واجعلنا من عتقاءك في هذا الشهر يا معطي يا وهاب
وارزقنا حلاوة القرآن و حسن تلاوته
زتدبر معانيه وفهم علي النحو الصحيح
ورطب ألسنتنا بذكر يا الله
طب من وقتها و انت قلت هاتنشر كل خميس
عارفه إنك صعب
بس أنا زى أى حد
نفسنا نطمن عليك و على الولاد
من فضلك نطمن
ربنا يصبركم
و الله العظيم أنا ما تخيلت إنى ممكن أعثر على المدونه دى
بالصدفه بادخل كلمة مصريه ف تحرير مدونتى هى دى المدونه اللى طلعت معاها
انا قريت عن المدونه دى ف الجرايد وقت ما دخلت التدوين
و و الله ما رايحه من بالى
و كتبت اللينك
بس لم أجرؤ على دخولها
ف سبحان الله تيجى هى لطريق
سبحان الله
اللهم اغفر لها و اسكنها جناتك يارب
و صبّر اللى كانت معاهم
و هاتفضل معاهم
الفاتحه
_________________________________
دا التعليق اللى سبته هناك
بجد مش عارفه أقولك إيه
بس أتمنى ترجع هنا للناس اللى بتحبك
و لو ساعه ف الأسبوع
رجعت أطمن و أسأل و أدور
يارب أسمع خير قريب
Post a Comment