Tuesday, July 24, 2007

فضحتينى يا بهلوله

طيب يا بهلوله ماشى عجباكى الفضايح دى
من ساعه ما طلعتى من المستشفى وانتى شما نفسك عليا قوى ليه



عماله تلبخى شمال ويمين زى المسعوره كده ليه


مش عاجبك الورد اللى كنت باجيبه فى المستشفى ؟


هو انا كنت مشتريه من بتاع البرسيم ولا ايه ؟


وانا كنت باكل اكلك مش انا اللى مشتريه ومشترى بزياده علشان ناكل سوى


حرام عليكى انتى يا بهلوله


اما الخروف عملتى عليه هيصه وفرجتى علينا امه لا اله الا الله ليه كده ؟


الاوضه اللى على المنور فاضيه مفهاش حاجه


يا جماعه احنا عندنا اربع اوض واسعين جدا ومطبخ واسع وحمام واسع بتنام فيه بهلوله ساعات


فى اوضه من الاربعه مفهاش غيرنيش قديم


وانا حبيت ااكل لحمه بمعرفتى


انا باعرف اربى كويس


وبحافظ على النظافه كويس قوى


فيها ايه لما اربى الخروف واتابعه بالنظافه والاهتمام


الدنيا مش هتولع


وخليكوا شاهدين بهلوله بنت ام بهلوله


حفيده بهلوله الدر


بتهددنى بالاكياس البلاستيك

اعقلى يا بهلوله احسن لك

اعقلى يا بنت الناس بدال ما اولعها على دماغك

اعقلى ولمى الدور احسن

انا راجل البيت واى حاجه اقولها تتنفذ

انا غلطان

انا غلطان

عارفين ليه ؟

كنت دخلت انا عملت العمليه لبهلوله وخلصت منها

17 comments:

Qabbani said...

طول بالك يا بهلول

بس بجد تربية الخاروف بالبيت مش حاجة مناسبة اطلاقا يعني مش نضافتك انته او اهتمامك

المشلكة بنفس الخاروف في البيت هي الفكرة

لوتعرف حد عند حوش او مزرعة صغيرة يحطلك ياه تمام ,او على السطح يعني مكان مكشوف و بعيد عن عنكم بس بنفس البيت صعبة

و الأهم راحتكم

عصفور المدينة said...

بهلول هدي النبرة شوية عشان فيه جيران عايزين يناموا
أطالب وبصفتي مندوب من الرقابة وحتى تكسب تضامن منا في حالة تفعيل موضوع الأكياس
أن تحذف كلمتي
مسعورة
وأولعها على دماغك
وبعدين هو انت لك في الجزارة كمان عايز تعمل العملية
:)

ftataljanna said...

السلام عليكم ورحمة الله وبركاته

اول حاجة
اساءة من حضرتك انك ما تردش على تعليقاتما على التدوينات السابقة

تانى حاجة بقى

بجد فعلا طريقة كلامك يا استاذ بهلول مش حلوة خالص

افتكر قول رسول الله صلى الله عليه وسلم رفقا بالقوارير

وبعدين

يا اخى فى الله
انا مش عارفه انت عندك بنت ولا لا

بس استحلفك بالله
تقيس كل حاجة بتعملها مع زوجتك على بنتك لو عندك بنت و ممكن على ابنك برضه ما جايز يتجوز واحدة تطلع عينه مفيش مشكلة

يا هداك الله

انا بيتهيالى حضرتك مش بتقرا تعليقاتنا اصلا

رجاءا

اخى

انه تترفق شوية في الحديث وكن هينا لينا هي في الاول ولا فى الاخر ست

واما عن موضوع الخروف

فيا سيدي اامر تجاب

بس لما تجيبه ما تقولها هوبى ناحية اوضته
خلينا نحكم بالعدل بقى

وبعدين خد بالك

الدراسة هاتبتدى قريب وشهر رمضان مرهق اصلا والعيال هايبقوا بيذاكروا بالعافية مش هاتبقى ناقصه كمان خروف ما ينيمهمش ولا يخليهم يذاكروا

عارف لو قلت لى هما اصلا فاشلين ومش بيفتحوا كتاب

هاقول لك غلطتك

لان اولادك دول امانة فى عنقك مش حاجة كده ربنا بعتهالك وزى ما تتصرف فيها اتصرف

لا يا اخى
ده انت هاتسال عنهم فى كل شيء صغيرة وكبيرة

لان تربيتك ليم هيا اللى تصلحهم او تفسده

وربنا يهديكوا لبعض يا رب آمين

بهلوله said...

مقبانى
عارف يا اخى بهلوله لو تهدى النبره معايا فى الكلام شويه تكسبنى
لكن هى عصبيه جدا ومن اقل حاجه تزعق وتقعد تخبط راسها فى الارض
وخلاص يا عم انا هاسمع نصيحتك واودى الخروف اللى لسه لم اشتريه بعد عند صاحبى محمد فى القليوبيه

بهلوله said...

مقبانى
نسيت اقولك
انا بهلول

بهلوله said...

عصفور المدينه
هو انا لو عملت لها العمليه
بقصد اللى بالى بالك محتاجه معرفه بالجزاره
ولا اى حاجه
بس كنت هريحكوا منها
وانا معتمد على وقوفك بجانبى
ولكن قبل تفعيل موضوع الاكياس
علشان لو اتفعل
هستفاد ايه وانا هناك

بهلوله said...

فتاه الجنه
وعليكم السلام ورحمه الله وبركاته
اعرف انكى تحبى بهلوله جدا
لكن ردك كان معتدلا
انا يا اختى الصغيره اعامل بهلوله وكأنها طفله صغيره
ارجو ان تقولى لها رفقا بزوجك
لانها تولع البيت لاتفه سبب
وانا احترم تعليقاتك واقدرها
ولكن بهلوله مستوليه بوضع اليد على الجهاز
كما انى اريد ان ارد باسمى وليس باسم بهلوله
فعندما عملنا المدونه لم اكن اعرف هذه المشكله
والى الان لا اعرف لها حل

Qabbani said...

عزيزي بهلول
الحل بسيط
:)

تروح تعمل ايميل على جي الميل

و تعمل دعودة مشاركة في المدونة

و تصير تحط التعليق بإسمك

حسن ارابيسك said...

بهلول
يعني هي ماكدبتش
وانت بتقول دلوقتي عاوز عندك غرفة فاضيه له
يعني انت ممكن العملية تكبر معاك وتوسع مشروعك
غرفه للخرفان
وغرفه للفراخ والبط
وغرفه للإرانب
وبعد كده بهلولة المسكينة ما تلاقيش حته تنام فيها ياعيني
هاتقولي حضرتك المطبخ موجود وهى واخده عالنوم فيه
هاقولك انت ناسي ان المطبخ انت مربي فيه ضفادع
حرام عليك تاخد ولاد الناس تمرمطهم
ده انت كنت واخدها زي الفله
تعبتها وقرفتها في عيشتها خليت البنيةجالها امراض الدنيا كلها ودخلتالمستشفى وعملت عملية
ايه اللي ناقص فيكي يابلد
حرام ده مايرضييش ربنا
جواز عتريس من فؤاده باطل
باطل
باطل
صحيح معكش بليه ازرق نيشان

بهلوله said...

MQabbani
ياعم مقبانى
والله العظيم ما اعرف اعمل كده
الوليه بهلوله هى اللى شاطره فى الكمبيوتر
انما انا ميح
بس ممكن افهم لو شرحت بشويش

بهلوله said...

حسن ارابيسك
يعنى ايه يا عم حسن ؟؟
ناوى تشيل المشاعل وتهيج اهل البلد عليا
لا اصحى يا ابو على
بهلول نابه ازرق ولحمه مر
واول راس هاقطعها هتكون راس فؤاده..قصدى بهلوله..لو اى حد حاول يخلصها منى
وعلى فاكره معايا بلى كتير وبعينك ومعايا كمان نواكل صينى قديمه وجديده
بس فيه حاجه
لعب البلى رياضه كبيره جدا تساعدك على العمل بجد ونشاط
بس اللى ميعرفش يقول عدس
مش عليك الكلام
على اللى ماتتسمى

اسلام رفاعى said...

انت عصبى ليه كده يابهلول اهدى شوية ياعم الحاج

ما علينا said...

طيب بالراحة شوية

خليها تنزل المرة دي وبس
كلمتك دي يعني خلاص مش لاقية سلالم تنزل عليها

يا بهلول الطيب احسن
انت عارف ان موضوع الاكياس مش صعب
دا اوام اوام

يا سيدي اشتري الخروف جاهز وخلاص

قلبي عندك

http://kasperb4.blogspot.com/ said...

أكتر مدونة بضحك فيها من قلبي والله
حتى لو عندي هموم الدنيا كلها
مجرد ما بقر اي تدوينة ليكم بنسى كل همومي

تقبلو تحيتي وربنا يديم عليكم السعادة والاستقرار
وبجد اسلوب جديد تماما في عرض المشاكل الزوجية
انا بتوقع لكم شهرة جامدة جدا في عالم التدوين

ليه متفكروش ف حاجة تشهر المدونة الجامدة دي ؟؟؟؟

بهلوله said...

اسلام رفاعى
حد يا ابو اسلام يبقى عنده واحده زى بهلوله ويهداء
ربنا يستر

بهلوله said...

ما علينا
خلصنا يا ستى موضوع الخروف
وبعت العلف وخسرت فيه فلوس وكل ده وخرست خالص
لكن ام قويق مش راضيه تسكت
حد يقول لها حاجه

بهلوله said...

آلام وآمال
انا بفكر
وفى مشروع فى دماغى يشهر المدونه بتاعتى
لكن فى الوقت الحالى
خليه سر
علشان ميوصلنيش لحبل المشنقه
عرفت ايه المشروع ؟؟؟؟
رحمه الله على بهلوله