السلام عليكم
قريت كلام بهلوله اللى كتباه انهارده
الوليه دى اكيد اتجننت انا بلعب بلى مع ولاد اختى ايوه يابهلوله حصل والله حصل وانتى مالك متغاظه ليه دول اطفال ولعبت معاهم ايه كفرت
بهلوله الزمى حدودك فى الكلام وانا لو مش حالف ان اى كلام تكتبيه ماليش دعوه بيه انا كنت طرباتها على دماغك
وبعدين انا لما اتخنقت معاهم على النيكل كنا بتهزر ياختى مالكيش دعوه
وتعالى هنا انتى فاكره نفسك اجاثا كريستى اصحى فوقى روحى خديلك دش علشان تفوقى انا عارف من بدرى انك بتخنصرى من ورايا ومطنش بمزاجى والله مطنش بمزاجى وعلشان تتاكدى روحى لصاحبتك ام شريف وخليها تسال جوزها انا حكيت معاه فى ايه وحلفيه على المصحف وهو هيقولك انى اتكلمت معاه وقلت له مراتى بتزوذ عليا فى الحاجات اللى بتشتريها قالى كبر دماغك وسيبها دى بتروح السوق تجيب حاجات ب30 جنيه بتسمسر 5 جنيه قصادهم يا سيدى لو انت رحت هتوجع دماغك وتناكف مع الناس بقد اللى هيه هتخده عشر مرات
ومن يومها وانا عارف ومطنش
اما حكايه البخل ده رايك وانتى حره فيه
بس فى حاجه انا مش فاهمها فى حكايه الصور هى ارخص من 30 جنيه بكتير ؟؟؟؟؟؟
Subscribe to:
Post Comments (Atom)
8 comments:
لا حول ولا قوة الا بالله
ليه كده
بص يا استاذ بهلول واضح ان حضرتك راجل طيب وابن حلال واما عن اللعب مع العيال الصغيرين على فكرة دى طريقة صحية جدا بس مع الاطفال تحت سن سبع سنين لان تبع منهج عمر بن الخطاب لاعبوهم سبعا وعلموهم سبها وصاحبوهم سبعا
ومش معنى كده انك ما تلعبش معاهم فى جميع المراحل بس اللعب مع الاطفال تحت سن سبع سنين الاولى بيكون بحدود بسيطة جدا
اما مع السبعة الثانية يعني من سبع سنين لاربعة عشر سنه اللعب معاهم بيكون لعب تعليمي اكتر منه هزار وتفاريح كده يعني
وربنا يبارك فى حضرتك وياريت بهلولة تكون بتقرا الكلام ده كمان
انا بجد سعيدة بمدوناتكوا ويارب تكون سبب في انكم تقربوا من بعض اكتر
كويس انها جت على قد كده
انا خايف يجي يوم وبهلولة تقول انك بتنزل تلعب البلي مع العيال في الشارع وكل يوم جايب لها وجع الدماغ مع الجيران بسبب خناقاتك مع عيالهم كل يوم على البلي
وانت تيجي تقول لا دي هيه بتنزل تجري ورا عربيه الرش وترجع بله هدومها
فرجتم عليكم الجيران
يا جماع عيب اكبروا بقى سمعتم بينا اجيران وسيرتكم بقت على كل لسان
ايه استاذ حسن ارابيسك ناوى توقع الناس في بعضيها ولا ايه
ده البلى للجدعان
وبعدين احنا جايين هنا نهدى النفوس
معلش يا استاذ بهلول
بس في ملحوظة بسيطة جدا
طريقة كلامك ماعجبتنيش اصحى فوقى وروحى خدى لك دش وهاطربقها على دماغك وكلام من كده
لا بجد ما ينفعش
وبعدين الست ربنا يخليها ما غلطتش هيا بتوضح وجهة نظر جواها على فكرة انت كويس انك ما بتحاولش تعاقبها عاللى هيا بتكتبه
هاقول لك حاجة
بجد
خليك ذكى يعنى ايه
يعني بدل ما تاخد كلامها على محمل سيء لا خده على انك بتحاول تفهم اللى جواها وتعرف هيا بتفكر فى ايه وشايفاك ازاى
ومش عيب انك لو لقيت حاجة محتاجة تتصلح جواك تصلحها
الانسان طول ما بيتعلم طول ما بيكون عرضه لانه يتغير واحنا مش علماء وحتى العلماء كل يوم بيتعلموا جديد يبقى احنا بالتاكيد قابليين للتغيير
وعلى فكرة الاعتراف بالحق فضيلة وحضرتك اعترفت بلعب البلى واكيد دي فضيله
وبر زوجتك على فكرة الزوجة الصالحة خير متاع الدنيا
وجزاكم الله خيرا
جايز انت تكون متضايق من حكاية المدونات اللى انتوا عملتوها وكده جايز تبقى ندمت انك امنت بهلولة على نفسها فى كل اللى هاتكتبه بس لما تحس بكده افتكر ان ده اكيد هايديكوا فرصة تصلحوا علاقتكوا وتقربوا من بعض وتحبوا بعض اكتر وهايخلي مواقفكوا اللى تضحك مع بعض اكتر يعني حياتكوا هايبقى لها طعم
ان شاء الله
وكمان انتوا بتاخدوا ثواب على كل شاب وفتاة هايتفادوا نفس اخطاؤكم
وربنا يكرمك يا رب ويرزقكم ذرية صالحة
راجل ولا كل الرجالة :)
احنا عارفين بس بنطنش
اعتقد اني عندي حل لحضرتك بدل ما تفضل توضح للناس ف الرد على التعليقات انك بهلول
انتي تيجي بعد ما تكتب الرد على التعليقات
هتلاقي تحت المربع اللي كتبت في الرد 3 اختيارت للاسم
الاولاني طبعا باسم بهلولة هانم
وده اللي عامل لحضرتك مشكلة
سيبك منه وبص على الاختيار التاني
other
اول ما تدوس عليه هيطلعلك خانتين تكتب فيهم اسم حضرتك
بهلول
والخانة التانية تحط فيها اللينك ( العنوان ) بتاع المونة بتاعتك
وبكده يطلع الرد على التعليقات باسم بهلول باشا
ونصيحة مني
ياريت تكتب الردود كلها ف مرة واحد على كل الناس
افضل ما تكتب كل رد على حده
لأن ده هيوفر عليك عناء نسخ اللينك ف كل مرة عشان تحطه تحت اسمك
واي خدمة يا باشا
:) :) :) :)
لا لا لا لا
محبش اشوفكوا متخانأين كدة
دى حتى بهلولة طيبة وبنت حلال
اينعم ممكن تكون بنخصر شوية يعنى بس هى اطيب من الطيابة وعسولة اوى
انا جاية اهدى النفوس ياجماعة
:D
لاء يا استاذ بهلول
لايمكن تسكت على الخنصرة دى
المفروض انها تقولك برض مهما كان ولا انته فى البيت ايه ؟
تقولك انا اشتريت بكذا وخدت كذا
ربنا يعينك عليها
Post a Comment